पदार्थः -
(शवसा) बलेन (वावृधानः) अतिशयेन वृद्धः। [लिटः कानजादेशः। चित्त्वादन्तोदात्तः।] (भूर्योजाः) बहुप्रतापः, (शत्रुः) दुष्टानां शातयिता इन्द्रः परमेश्वरः (दासाय) यज्ञादिसत्कर्मणां विध्वंसकाय (भियसम्) भयम् (दधाति) उत्पादयति। हे इन्द्र परमात्मन् ! (अव्यनत् च) अप्राणं च (व्यनत् च) सप्राणं च जगत्। [विविधम् अनिति प्राणिति इति व्यनत्, तद्विपरीतम् अव्यनत्, स्थावरं जङ्गमं च जगदिति भावः।] (सस्नि) त्वया संस्नातं सम्यक् शोधितं, भवतीति शेषः। [ष्णा शौचे, ‘आदृगमहनजनः किकिनौ लिट् च’ अ० ३।३।१७५ इति किन् प्रत्ययः।] हे देव ! (ते) तव, त्वया जनितेष्वित्यर्थः (मदेषु) हर्षेषु (प्रभृता) प्रकर्षेण धृतानि पोषितानि च सर्वाणि भूतजातानि (सन्नवन्त) त्वां संस्तुवन्ति ॥२॥

भावार्थः - अनन्तबलाज्जगदीश्वराद् दुष्टा बिभ्यति सज्जनाश्च तेन पालिताः पोषिताश्च भूत्वा श्रद्धापरवशास्तं भूयो भूयः स्तुवन्ति ॥२॥

इस भाष्य को एडिट करें