टिप्पणीः - ५–क्लन्दाः। क्लदि आह्वाने रोदने च–पचाद्यच्। टाप्। आवाहनशीलाः। तमिषीचयः। तमि–षिचयः। सर्वधातुभ्य इन्। उ० ४।११८। इति तमु इच्छायां खेदे च–इन्। इगुपधात् कित्। उ० ४।१२०। इति षिच सेचने–इन्, किति ह्रस्वः। छान्दसो दीर्घः। तमिम् इच्छां सिञ्चन्ति तास्तमिसिचयः। इच्छापूरयित्र्यः। अक्षकामाः। अक्षू व्याप्तौ, संहतौ–पचाद्यच्। यद्वा। अशेर्देवने। उ० ३।६५। इति अशू व्याप्तौ–स प्रत्ययः। अक्षो व्यवहारः। यथा, अक्षदर्शकः, अक्षदृक्=व्यवहारनिर्णेता, न्यायकर्त्ता। काम्यतेऽसौ। कमु स्पृहायाम्–कर्मणि घञ्। अक्षेषु व्यवहारेषु सत्कर्मसु कामोऽभिलाषो याभ्यस्तास्तथाभूताः। व्यवहारोत्साहिन्यः। मनोमुहः। मनस्+मुह वैचित्ये–क्विप्। मनसः, चित्तस्य मोहयित्र्यः, आश्चर्ये विस्मये कर्त्र्यः। गन्धर्वपत्नीभ्यः। विभाषा सपूर्वस्य पा० ४।१।३४। इति गन्धर्व+पति–नकारङीपौ। गन्धर्वः पूर्वोक्तः परमात्मा पतिः, रक्षकः, स्वामी यासां ताभ्यः। गन्धर्वेण परमेश्वरेण रक्षिताभ्यः। अप्सराभ्यः। मन्त्रे ३। आकाशप्राणादिषु वर्त्तमानाभ्यः। अकरम्। डुकृञ् करणे–लुङ्। कृमृदृरुहिभ्यश्छन्दसि। पा० ३।१।५९। इति च्लेः अङ् आदेशः। ऋदृशोऽङि गुणः। पा० ७।४।१६। इति गुणः। अहं कृतवान्। नमः। सत्कारम् ॥

इस भाष्य को एडिट करें