टिप्पणीः - ३−(यः) इन्द्रः (चर्षणिप्रः) अर्तिसृधृ०। उ० २।१०२। इति चर गतौ-अनि, षुगागमश्च। यद्वा। कृषेरादेश्च चः। उ० २।१०४। इति कृष विलेखने-अनि, आदेश्च चः। चर्षणयो मनुष्याः-निघ० २।३। आतोऽनुपसर्गे कः। पा० ३।२।३। इति प्रा पूरणे-क। मनुष्याणां मनोरथपूरकः। (वृषभः) अ० ४।५।१। सुखस्य वर्षकः। श्रेष्ठः (स्वर्वित्) अन्तर्गतण्यर्थः। स्वर्गस्य प्रापयिता (यस्मै) इन्द्राय (ग्रावाणः) अ० ३।१०।५। गॄ विज्ञापे-क्वनिप्। शास्त्रविज्ञापकाः। पण्डिताः (प्रवदन्ति) प्रकथयन्ति (नृम्णम्) णम प्रह्वत्वे शब्दे, च-पचाद्यच्। पृषोदरादित्वादाद्यन्तवियर्ययोऽलोपश्च। इति नृणम्, रूपं जातम्। नृम्णं च बले नॄन्नतम्-निरु० ११।९। नॄन् नमयति प्रह्वीकरोतीति। बलम्-निघ० २।९। धनम्-निघ० २।१०। (यस्य) इन्द्रस्य (अध्वरः) अ० १।४।२। सन्मार्गदाता हिंसारहितो वा व्यवहारः (सप्तहोता) सप्त+हु दानादानादनतर्पणेषु-तृच्। सप्तहोता सप्तास्मै रश्मयो रसानभिसन्नामयन्ति, सप्तैनमृषयः स्तुवन्तीति वा-निरु० ११।२३। सप्त त्वक्चक्षुःश्रवणरसनाघ्राणमनोबुद्धयो होतारो विषयाणां ग्रहीतारो दातारः साक्षात्कर्तारो यस्य स सप्तहोता। अत्र [सप्त प्राणान्] इत्यस्य पदस्य, अ० २।१२।७। तथा [सप्तऋषयः] इति पदस्य च, अ० ४।११।९। व्याख्या द्रष्टव्या। (मदिष्ठः) मदी हर्षे=तृच्। तुश्छन्दसि। पा० ५।३।५९। इति इष्ठन्। तुरिष्ठेमेयस्सु। पा० ६।४।१५४। इति तृलोपः अतिशयेन मादयिता हर्षकः। अन्यत् पूर्ववत् ॥

इस भाष्य को एडिट करें